జనతా వారధి కార్యక్రమంలో భాగంగా ఈరోజు పల్నాడు జిల్లా కలెక్టర్ కార్యాలయంలో వినతి పత్రం సమర్పించడం జరిగింది

జనతా వారధి కార్యక్రమంలో భాగంగా ఈరోజు పల్నాడు జిల్లా కలెక్టర్ కార్యాలయంలో  వినతి పత్రం సమర్పించడం జరిగింది 

 ఈ కార్యక్రమంలో పల్నాడు జిల్లా జనతా వారధి కన్వీనర్ మరియు పల్నాడు జిల్లా ఉపాధ్యక్షుడు మల్లెల శివ నాగేశ్వరరావు నరసరావుపేట బిజెపి నాయకులు సంపత్ కుమార్ తదితరులు ఈ కార్యక్రమంలో పాల్గొని కార్యక్రమాన్ని విజయవంతం చేశారు 

గౌరవ జిల్లా కలెక్టర్ గారికి,

పల్నాడు జిల్లా.

విషయం:

ఆలయాలను సాంస్కృతిక శిక్షణ కేంద్రాలుగా అభివృద్ధి చేయడం మరియు TTDతో పాటు రాష్ట్రంలోని అన్ని ఆలయాల్లో సాంస్కృతిక ప్రదర్శనల ఎంపికకు పారదర్శక విధానం రూపొందించవలెనని వినతి.

సనాతన ధర్మ పరిరక్షణలో ఆలయాలు అత్యంత కీలకమైన పాత్ర పోషిస్తున్నాయి. ఆలయాలు కేవలం పూజా కార్యక్రమాలకు మాత్రమే పరిమితం కాకుండా, భారతీయ సంస్కృతి, సంప్రదాయాలు, కళలు, ఆధ్యాత్మిక విలువలను భావితరాలకు అందించే కేంద్రాలుగా కూడా అభివృద్ధి చెందాల్సిన అవసరం ఉంది.

భారతీయ జనతా పార్టీ నిర్వహిస్తున్న "జనతా వారధి" కార్యక్రమంలో రాష్ట్రంలోని అనేక మంది సాంప్రదాయ సాంస్కృతిక కళాకారులు, భజన సంఘాలు, కోలాట బృందాలు, హరికథకులు, జానపద,కూచిపూడి నృత్యం, భరతనాట్యం, ఆంధ్ర నృత్యం, హరికథ, బుర్రకథ, భజన మండలి, చెక్క భజన, డప్పు నృత్యం, ధింసా నృత్యం, ఒగ్గు కథ, వీధి భాగవతం, యక్షగానం, తోలుబొమ్మలాట, కీలుబొమ్మలాట, పులివేషం, గరగ నృత్యం, పోతురాజు వేషం, గంగిరెద్దుల ఆట, చిందు భాగవతం, గొబ్బి నృత్యం, నాగస్వరం–మంగళ వాయిద్య ప్రదర్శన, డోలు, డప్పు, సన్నాయి వాద్య బృందాలు, వేద పారాయణం, అన్నమాచార్య సంకీర్తనలు, త్యాగరాజ కీర్తనలు, రామదాసు కీర్తనలు, లలిత, శివ, దేవి భక్తి గాన కళాకారులు తమ సమస్యలను మా దృష్టికి తీసుకువచ్చారు. వారి అభిప్రాయాలను పరిశీలించిన తరువాత రెండు ప్రధాన అంశాలపై రాష్ట్ర ప్రభుత్వం ప్రత్యేక విధానం రూపొందించవలసిన అవసరం ఉందని భావిస్తున్నాము.

1. *ఆలయాలను సాంస్కృతిక శిక్షణ కేంద్రాలుగా అభివృద్ధి చేయాలి* 

ప్రస్తుతం అనేక మంది కళాకారులు శిక్షణ కార్యక్రమాలు నిర్వహించడానికి ఆలయాల్లో అనుమతులు పొందడంలో ఇబ్బందులు ఎదుర్కొంటున్నట్లు తెలియజేస్తున్నారు. దాంతో వారు ప్రైవేట్ హాళ్లు లేదా అద్దె భవనాల్లో శిక్షణ నిర్వహించాల్సి వస్తోంది. పెరుగుతున్న అద్దెల కారణంగా శిక్షణకు రుసుము వసూలు చేయాల్సిన పరిస్థితి ఏర్పడుతోంది. ఈ పరిస్థితి పేద మరియు మధ్యతరగతి కుటుంబాల పిల్లలు, యువత ఈ కళలకు దూరమయ్యే అవకాశాన్ని పెంచుతోంది.

• దేవాదాయ శాఖ పరిధిలోని ఆలయాల్లో దశలవారీగా ఉచిత సాంస్కృతిక శిక్షణ కేంద్రాలు ఏర్పాటు చేయాలి.

• ప్రతిరోజూ ఉదయం లేదా సాయంత్రం కనీసం ఒక గంట శిక్షణ నిర్వహించాలి.

• భజన, కోలాటం, చెక్కభజన, హరికథ, యక్షగానం, పురాణ ప్రవచనం, నాదస్వర సంగీతం తదితర పైన సూచించిన సాంప్రదాయ కళలకు శిక్షణ ఇవ్వాలి.

• స్థానిక అర్హత కలిగిన కళాకారులను పార్ట్‌టైమ్ శిక్షకులుగా నియమించి వారికి గౌరవప్రదమైన పారితోషికం అందించాలి.

• స్థానిక ఆలయ సంప్రదాయాలకు అనుగుణంగా ఏ కళారూపాలకు శిక్షణ ఇవ్వాలనే అంశాన్ని నిర్ణయించే అవకాశం కల్పించాలి.

• శిక్షణ పూర్తిచేసిన వారికి ధ్రువపత్రాలు, ఆలయ ఉత్సవాల్లో ప్రదర్శన అవకాశాలు కల్పించాలి.

సనాతన ధర్మానికి సంబంధించిన సంప్రదాయ కళలు పరిరక్షించబడతాయి. యువతలో సృజనాత్మకత, క్రమశిక్షణ, సాంస్కృతిక అవగాహన పెరుగుతుంది. స్థానిక కళాకారులకు గౌరవప్రదమైన ఉపాధి లభిస్తుంది. ఆలయాలు పూజా కేంద్రాలతో పాటు సాంస్కృతిక విద్యా కేంద్రాలుగా అభివృద్ధి చెందుతాయి. అంతరించిపోతున్న సంప్రదాయ కళలకు కొత్త తరం సిద్ధమవుతుంది.

2. *ఆలయ ఉత్సవాల్లో సాంస్కృతిక ప్రదర్శనలకు పారదర్శక విధానం రూపొందించాలి* 

రాష్ట్రంలోని అనేక మంది కళాకారులు ఆలయ ఉత్సవాల్లో పాల్గొనే అవకాశాల కోసం స్పష్టమైన విధానం అవసరమని కోరుతున్నారు. ముఖ్యంగా తిరుమల తిరుపతి దేవస్థానం (TTD) బ్రహ్మోత్సవాలు, ఇతర ప్రధాన ఆలయాల వార్షిక ఉత్సవాలు, దేవాదాయ శాఖ పరిధిలోని ఆలయాల కార్యక్రమాల్లో పాల్గొనే కళాకారుల ఎంపికకు ఒకే విధమైన పారదర్శక వ్యవస్థ అవసరం.

• ఈ నేపథ్యంలో క్రింది విధానం అమలు చేయవలసిందిగా వినతిచేస్తున్నాము.

• రాష్ట్రవ్యాప్తంగా భజన సంఘాలు, కోలాట బృందాలు, హరికథకులు, జానపద కళాకారులు మరియు ఇతర సాంప్రదాయ కళాకారుల నమోదు చేపట్టాలి.

• జిల్లా కలెక్టర్ ఆధ్వర్యంలో లేదా జిల్లా స్థాయి కమిటీ ద్వారా కళాకారుల అర్హత పరిశీలన చేసి జిల్లా వారీగా డిజిటల్ డేటాబేస్ రూపొందించాలి.

• TTD, ప్రముఖ దేవాలయాలు మరియు దేవాదాయ శాఖ పరిధిలోని ఆలయాలు ఈ నమోదిత జాబితా నుంచే అవసరానికి అనుగుణంగా కళాకారులను ఎంపిక చేసే విధానాన్ని అమలు చేయాలి.

• ఎంపిక ప్రమాణాలు, ఎంపికైన కళాకారుల జాబితా, ప్రదర్శనల వివరాలు, పారితోషిక వివరాలను ప్రజలకు అందుబాటులో ఉంచాలి.

• ప్రతి జిల్లాకు తగిన ప్రాతినిధ్యం కల్పించే విధానాన్ని రూపొందించాలి.

• కళాకారుల ఫిర్యాదుల పరిష్కారానికి ప్రత్యేక వ్యవస్థ ఏర్పాటు చేయాలి.

కళాకారులకు సమాన అవకాశాలు లభిస్తాయి. ఎంపిక ప్రక్రియలో పారదర్శకత పెరుగుతుంది. వ్యక్తిగత సిఫారసులు లేదా పరిచయాలపై ఆధారపడే పరిస్థితి తగ్గే అవకాశం ఉంటుంది. కొత్త ప్రతిభావంతులకు అవకాశాలు లభిస్తాయి. రాష్ట్రంలోని అన్ని ప్రాంతాల సంప్రదాయ కళలకు సముచిత ప్రాతినిధ్యం లభిస్తుంది. కళాకారుల గౌరవం, విశ్వాసం పెరుగుతుంది.

జిల్లాలో ఆలయాలను సనాతన ధర్మం, భారతీయ సంస్కృతి, సంప్రదాయ కళల పరిరక్షణకు జీవంతమైన కేంద్రాలుగా అభివృద్ధి చేయడానికి పై రెండు అంశాలపై సమగ్ర విధానం రూపొందించి అమలు చేయవలసిందిగా మీ ద్వారా రాష్ట్ర ప్రభుత్వాన్ని వినయపూర్వకంగా కోరుచున్నాము.

ధన్యవాదములతో,

భవదీయులు,

పల్నాడు జిల్లా జనతా వారధి టీమ్ 

భారతీయ జనతా పార్టీ

పల్నాడు జిల్లా